ကမ္ဘာ့တန်ဖိုးအကြီးဆုံး လူမှုကွန်ရက်ကုမ္ပဏီ ဖြစ်လာတဲ့ Tencent
Tech

Facebook ကို ကျော်ပြီး ကမ္ဘာ့တန်ဖိုးအကြီးဆုံး လူမှုကွန်ရက်ကုမ္ပဏီ ဖြစ်လာတဲ့ Tencent

Written by Chan Myae Maung

Tencent ရဲ့ ဈေးကွက်တန်ဖိုးဟာ အမေရိကန်ဒေါ်လာ ၅၃၄.၅ ဘီလျံ ရှိလာပါတယ်။ လစဉ်သုံးစွဲသူ သန်း ၂၀၀၀ ကျော်ရှိထားတဲ့ Facebook ဟာ ကမ္ဘာ့အကြီးဆုံးလူမှုကွန်ရက်အသိုင်းအဝိုင်းတစ်ခုကို ပိုင်ဆိုင်ထားပေမယ့် ကုမ္ပဏီတန်ကြေးအရ ပြောမယ်ဆိုရင် တရုတ်မှ WeChat ကို ပိုင်ဆိုင်တဲ့ Tencent ကို မမှီပါဘူး။

လူမှုကွန်ရက် စာပို့ အက်ပလီကေးရှင်း ၊ ဂိမ်းနဲ့ တစ်ခြား contents တွေနဲ့ ကြီးပွားလာတဲ့ Tencent ဟာ အာရှမှာ ပထမဆုံး ဘီလျံ ၅၀၀ ကျော်တန် ကုမ္ပဏီကြီး ဖြစ်လာပြီးနောက် ကမ္ဘာ့အကြီးဆုံး ကုမ္ပဏီ ၅ ခုစာရင်းဝင်သွားပါတယ်။ ဒါဟာ ယခုနှစ်ထဲ ဈေးကွက်ရှယ်ယာ နှစ်ဆတိုးလာတဲ့ Tencent အတွက် မင်္ဂလာသတင်းလည်း ဖြစ်ပါတယ်။ ဒါ့အပြင် တရုတ်ပြည်တွင်းက ပြိုင်ဘက် e-Commerce ကုမ္ပဏီ Alibaba ကိုလည်း ကျော်ဖြတ်နိုင်ပြီ ဖြစ်ပါတယ်။

ဟောင်ကောင်စတော့ ရှယ်ယာဈေးကွက်မှာ Tencent ကို ရင်းနှီးမြှပ်နှံသူများ မြင့်တက်လာခြင်းကြောင့် အခုဆို Tencent ရဲ့ ဈေးကွက်တန်ဖိုးဟာ ဟောင်ကောင်ဒေါ်လာ ၄.၁၇ ထရီလီယံ (အမေရိကန်ဒေါ်လာ ၅၃၄.၅ ဘီလျံ) ရှိလာပြီဖြစ်တာကြောင့် ဒေါ်လာ ၅၁၉.၄ ဘီလျံတန် Facebook ကို အသာလေး ကျော်ဖြတ်သွားတာပါ။ အခုဆို Tencent ဟာ ဒေါ်လာ ၅၄၂.၇ ဘီလျံတန် Amazon နဲ့ နေရာချင်းလဲလောက်အောင် နီးကပ်လာပြီ ဖြစ်ပါတယ်။ သို့ သော်လည်း Tencent ဟာ ဒေါ်လာ ၈၇၃ ဘီလျံကျော်တန်တဲ့ Apple ကိုတော့ ယှဉ်လို့ မရသေးပါဘူး။

Tencent ဟာ WeChat လူမှုကွန်ရက်အပြင် WeChat Pay ငွေချေစနစ်၊ Honor of Kings ဗွီဒီယိုဂိမ်းစတဲ့ နာမည်ကြီး ထုတ်ကုန်တွေကြောင့် တဟုန်းထိုး ချမ်းသာလာတာလည်း ဖြစ်ပါတယ်။ ၂၀၀၄ ခုနှစ်မှာ အများပိုင် ကုမ္ပဏီအဖြစ် ပထမဆုံးအကြိမ် ပြောင်းချိန်မှာ ရှယ်ယာတစ်စုကို ဟောင်ကောင်ဒေါ်လာ ၃.၇ ဒေါ်လာ ပဲ ရှိခဲ့ပေမယ့် ၁၃ နှစ်အကြာ ဒီနေ့ အချိန်မှာတော့ ရှယ်ယာတန်ကြေးဟာ ရာခိုင်နှုန်း ၁၁၀၀၀ အထိ မြင့်တက်လာခဲ့ပြီ ဖြစ်ပါတယ်။

About the author

Chan Myae Maung

Leave a Comment